şimşək şəhbazinin türkcə şerləri

داریخمیشام


یورد -یوواسی قانلا دولان


آرزولاری یالان اولان


تاپدالانان تالان اولان


ائلی گؤروب داریخمیشام


وارلیقلاری اولموش یالان


اوزون زامان تاپدالانان


یاساق اولان قاداقلانان


دیلی گؤروب داریخمیشام

اینسانلاری بوتون یورغون


اوره ک دردلی ، گؤزلر دولغون


یایی پوزغون ، یازی سولغون


ایلی گؤروب داریخمیشام

قانا باتمیش قاراباغی


یولو باغلی قاراداغی!!


ائل ساراسین بوغان چاغی


سئلی گؤروب داریخمیشام

 

نوشته شده درسه شنبه هفدهم تیر 1393ساعت 4:25 توسط شاهین| |

اوره ییمده گیزلی یارا

ائدیب منی زار آی حکیم

قوی دردیمی چکیم اؤزوم

ائده نمیرم جار آی حکیم


اوره ییمین یاراسینا

پارام-پارام پاراسینا

گیزلین دردین چاراسینا

هاردا درمان وار آی حکیم؟


یئکه توتوبلار تیکه نی

درده دوشسون درد اکه نی

سیله بیلمز بو لکه نی

قوهوم ، قارداش ، یار آی حکیم


ایدی منی یئرسیز یالان

قوینومدایمیش شاهمار ایلان

اؤزگه دئییل منی چالان

دونیام اولوب دار آی حکیم


اولماز قالما-قالا دوشدوم

یامان آهی زارا دوشدوم

اؤلومدن پیس حالا دوشدوم

یئرسیز اولدوم خار آی حکیم


یالان مئیدان سوره ن یئرده

درده دوشدوم یامان یئرده

قوی دردیمی پرده پرده

زار آغلاسین ، تار آی حکیم


یول سارسیدیر یول گئده نی

درد الیندن بو گئجه نی

یاتانمیرام ، سانکی منی،

چالیبدیر شاهمار آی حکیم

85/5/1

نوشته شده دریکشنبه هفتم اردیبهشت 1393ساعت 13:29 توسط شاهین| |


قارا دومان

چکیل گؤزلریمین اؤنوندن ، چکیل

سن منی کوراتدین آی قارا دومان

چکیل

آنا طبیعته دویونجا باخیم

ساختالیقدان یورولموشام ، شهرلرده

سحر آخشام آلدانیجی

مین بزکلی بویالار

اینسانلیغی اینسانلاردان آلیبدی

بوردا حقیقت وار

بوردا صفا وار

بوردا دوغمالیق وار

یان اول آی دومان...

چکیل باخیم دره لره داغلارا

باخیم بو چایلارا گؤزوم دولوسو...

باخیم یاشیل اؤرپک اؤرتن باغلارا

چکیل قارا دومان کوراتما منی...

بو داغلار - قایالار

بو آخان چایلار

یاشیل چمنلرده آل الوان چیچک

گؤرن بو تابلونون رسامی کیمدیر؟؟

چکیل بو ازلی ابدی تابلو

کؤنلومده حک اولوب ابدی قالسین

پرده چکه گؤزلریمین اؤنونه

بو چؤللرده گؤرمه لریم وار منیم

بو داغلاردا قارا چوبان ، خان چوبان

داشغین سئل ده سارالاریم وار منیم

هر بیر داشدان مین خاطیره بویلانیر

بابالارین ایزی واردیر بو چؤلده!!

قایالارلا سینه له شن

قار کولک له چوماقلاشان قارا چوبان

هله ده وار

گؤز تیکیب دیر یوللارا...

بو قاطار - بو قاطار

بو ده میر مینیک

بیزی گتیریبدیر اونلا گؤروشه

چکیل قارا دومان

قوی سالاملاشاق

یان اول ال قووزاییم او خان چوبانا

بیلدیریم کی زحمتینی بیلیرم

اونو داها اوستون اینسان سانیرام

او اکینچی

او بیچینچی

او باغچادا سو - سوواران

زحمت چکن ، درده دؤزن

ساده اینسان

قانع اولان

اداسیز ، وطن داش دیر!

اونو گؤرمک زیارت دیر

او گؤروشلر سعادت دیر

دومان چکیل آرامیزدان

اونو گؤرمک ایسته ییرم

اونو بیلمک ایسته ییرم...



شیمشک شهبازی

صبا قاطاری

ده میر یول-اورتا شهری 85/2/15
 

نوشته شده درچهارشنبه بیست و یکم اسفند 1392ساعت 1:35 توسط شاهین| |

اوتانیم یئرینه آی بولود سنین

آللاهین آلتیندا آغ ائله­ ییرسن

آلیشیر جییه ­ری چؤلون، چمنین

یاغیشی دنیزه سپه­ لیییرسن

اوتانیم یئرینه سنین آی دنیز

سوسوزلار قوینوندا یئتمیر کامینا

چایلارین باشینی کسیب تر-تمیز

دؤنموسن سولارین قبریستانینا

بو دا کی، مین ایل­لیک تورک قبریستانی

آنالار کور اولدو آ؛ی دئمکدن

پاوتانیم یئرینه تورک یاتاغانی

گؤزلرین دویمادی تورکو یئمکدن

اوتانیم یئرینه میصری قیلینجیم

توفک چیخان کیمی قینینا گیردین

اوتانیب قیزاریر سنه گوونجیم

سن اؤز قانیمیزا یئریک­لییردین!

اینانجیم گوونجیم قوچ کوراوغلو دین

دوشمنین کیم ایدی؟، حسن پاشایدی!

«لئش بیر یانا، باش بیر یانا» دئییردین،

قالاغا ووردوغون قارداش باشی ایدی...                             شاهمار اکبرزاده


اعتراض!!

قبرین نورلا دولسون آی اکبر شاهمار

اوتانیم یئرینه آی اوتانمایان

شاه بابام خطایی ، آی سولطان سلیم

نه گؤزل سؤیله دین ، روحون شاد اولسون

اعتراض ائدنده ده رین فیکرینه

سوسور، قلم سوسور الیم تیتره ییر

آنجاق بیر سؤز وارکی دئمه سم اولمور!

کوراوغلو دئینده باغریم آلیشیر

کوراوغلو دئینده یاخیلیرام من...

کوراوغلو تاریخده اوتانمامالی،

او قوچاق نه ییندن اوتانسین آخی؟!!

فئودال دان - سولطان دان حسن پاشا تک

یازیق کوتله لره قان اوتدوراندان

ایگید کوراوغلویه قارداش اولانماز

قالاغا ووردوغو ظالیم باشییدی!

لئش بیر یانا باش بیر یانا دئینده

باشسیز قالان لئشلر دوشمان لئشیدی!

پاشانین - سولطانین

ظالیم خودکارین

ظولمو-جینایتی بیداد ائدنده

قالخیب چنلی بئله قیام یاراتدی

اونون انقیلابی ظولم علئیهینه،

اوجا نعره لری آزادلیق سسی!!

اونون حاق سسی نه قوچاقلار گلدی

عدالت اوردوسو قوردو کوراوغلو

بو قوچاق نه ییندن اوتانسین آخی؟!!

خالق آرا قورولموش حقیقت-دیوان

عدالت حؤکمونو صادر ائیله میش

اجراسی وئریلمیش قوچ کوراوغلویا

خالقا ظولم ائده نین گؤز چیخاردانین!!

قیصاصین ائدیردی ایگید کوراوغلو!

ظالیم له مظلومون نه قارداشلیغی؟!

قانلی قیام ائتمیش ظولوما قارشی

او اصلا اؤزوندن اوتانمامالی

او قوچاق نه ییندن اوتانسین آخی؟!!

بیز گرک اوتاناق

حؤکمن اوتاناق

بیز بؤیون اییریق ظولمه-ظالیمه

بیز مئیدان وئرمیشیق ظولم ائدنلره

جسارت ائیله دیم چاراسیزلیقدان

باغیشلار اولسون کی،

منی باغیشلار

اوستاد شاهمار روحو منی عفو ائیلر...

نوشته شده درجمعه بیست و دوم آذر 1392ساعت 23:57 توسط شاهین| |

گؤزله ییر ، گؤزلر یولون ، گؤزلر گؤروش محتاجیدیر

سن کوسوب گئتدین گؤزل ، کؤنلوم باریش محتاجیدیر

گل عنایت قیل پری جانیم فراغیندا یانیر

گؤزلریم یوللاردا قالمیش بیر باغیش محتاجیدیر

تاپمادیم بیر آشنا یادلار ایچینده خسته یم

خسته جانیم دردینه ، درمان تانیش محتاجیدیر

شاد اولوب گولمز کؤنول ، بسدیر داها هجران گولوم

گؤزلریم هیجرینده آغلار ، بیر گولوش محتاجیدیر

بیر تبسم قیل باری ، گؤرسون گولور کؤنلوم یاری

بو سینیق کؤنلوم پری ، بیر گول -دانیش محتاجیدیر

لبلرین شهد شکر ، گؤزلرین مئی نشئه سی

کؤنلوم اول گؤزدن گؤزل ، بیرجه باخیش محتاجیدیر

ای باهارین ابری تک اول )) شیمشگین(( دولغون گؤزو

عشقیمین گولزارینا بیر یاغ ، یاغیش محتاجیدیر

۷۶/۷/۷

نوشته شده درپنجشنبه یازدهم مهر 1392ساعت 0:38 توسط شاهین| |

من آذربایجانام ، آذربایجانام

یارالی توپراغام یارادیر سینم

آغ بیر گؤیرچینم باریشیق قوشو

اووچولار الین دن یارالی یام من...

ایکی قانادیم وار اوچا بیلمیرم

بیری یارالی دیر!

بیری باغلی دیر!!

من آذربایجانام دوستلوق دونیاسی

من آذربایجانام باریشیق سسی

دیلیمی کسیب لر قاداقدان منیم!!

بیر اوغول آناسین دوغرایان کیمین!!

آراز قیلینج لاییب سینه دن منی!!

یارالی توپراغام یارام قان وئریر،

سانکی آنا قوجاغیندا بیر کؤرپه کیمی

یارالی قاراباغ، بالام جان وئریر...

دوشمنلر الینده اسیردی بالام

جان وئریر قاراباغ یامان جان وئریر...

ایگید بیر اوغلوم وار آدی قاراداغ

اون سککیز ماحاللی آدلی سانلی دیر

اودا اسیر دوشموش اودا اسیردیر!!!

اونوندا چوخداندیر قوللاری باغلی!!

اونوندا آرازدان یوللاری باغلی!!

قاراباغ-قاراداغ حسرت داستانی..

یارالی توپراغام آذربایجانام

سینمده یارا وار تام آراز بویدا

آغ بیر گؤیرچینم یارالانمیشام

هر زامان-هر زامان یارام تازادیر...

تاریخلر بویونجا من یارالی یم

کؤهنه یارالاریم تازا قان وئریر...

یاریم او تایدادیر- یاریم بو تایدا

سئوگیم او تایدادیر یاریم او تایدا

حسرت چلنگیمی آلان اولمادی

سولدو اللریمده چیچک لر منیم

هاراییم بوغولوب ایچیمده منیم

محو اولوب اوره کده مینلرجه آرزوم

آرزوسو گؤزونده قالان لاردانام

ایکی قانادیملا اوچا بیلمیرم

ایکی یه بؤلونن آذربایجانام...

سینه سی آل - قانلی آذربایجانام.




نوشته شده دریکشنبه بیست و چهارم شهریور 1392ساعت 1:31 توسط شاهین| |


اورمو دنیزیندن
اورمو گؤلوندن
دورنالار قاییدیر
واخت سیز ، وعده سیز!!
دیمدیگی قانادی دوز باغلاییبدیر
دوزلاغا چئوریلن دنیزدن قاچیر!!
گؤیده بیر-بیریله قونوشور قوشلار...
داها دنیز ده ییر بورا دوز چؤلو
بوردان هر جانلی نین قاچماسی گرک...
بیر یاندا اورمودور بیر یاندا تبریز
آرادا جان وئریر سوسوزدان دنیز...
چایلارین آخاری - آخمیر دنیزه
آرازیندا سویو گلیب چاتمادی؟!
دوزلاغا چئوریلیر ، دوزلاغا دنیز!!
آخاری بوغولوب - آخار سولارین
داها سولو چایلار - چایلاغا دؤنوب!!!
قیریلیب دؤرد یاندان قولون قانادین
اورمو دنیزی نین سون نفسی دیر
گؤزلرین اؤنونده اورمو جان وئریر
جان وئریر ، قوجامان دنیز جان وئریر...
بؤیوک فاجعه دیر آذربایجانا
بوردا بیر دنیز یوخ ، طبیعت اؤلور...!!
بوردا تهلوکه لی فاجعه دوغور
بوردا بیر میللتین وارلیغی گئدیر!!
بوردا طبیعت ده هر نه وار اؤلور...!!
دورنالار- سونالار دیمدیگی دوزدا
دنیز قوجاغیندا سوسوز جان وئریر
سوسوزدان دوداغی چاتلایان دنیز،
یاردیما چاغیریر آخار چایلاری!!!
بوردا آرتمیا نسلی کسیلیر
بوردا اکوسیستم محو اولوب گئدیر!!
بلکه ده نه بیلیم گؤرموروک بونو؟!!
یوخسا علاجی نی ائده بیلردیک...
یوخسا گرک لرین طلب ائدردیک...
فاجعه نین ده رین لیگین بیلمیریک
جننت آذربایجان جهنم اولور!!!
بیز هله زارافات سانیریق بونو!!
یا هله اویموشوق بوش وعده لره
بیز هله بیلمیریک ایرنج فیکیرلر،
بیز هله بیلمیریک چوخ مغرض اللر
بیزی محو ائتمگه پیلانلار چکیر!!!
اویان آذربایجان یاتما بو قده ر...
یالانچیق وعده لر - عمل سیز سؤزلر
بیزی یوخلاتماغا ساختا لایلادیر!!!
اورمو گؤلو گؤز اؤنونده جان وئریر
دوزلاغا چئوریلیر اورمیه - تبریز
دوز چؤلو یارانیر آرزولار بویدا
اینانمایین بوش وعده یه - بوش سؤزه
پیلانلی جهنم یارانیر بوردا!!
یالنیز بیر یولو وار- بیرجه یول قالیر
یئنی بیر انقلاب - یئنی بیر ایستک
یوخسا هر جانلی نین قاچماسی گرک...

شعر: شیمشک شهبازی

urmu gölü can verir
urmu dənizindən
urmu gölündən
durnalar qayidir
vaxtsiz vədəsiz!
dimdiyi qanadi duz bağlayibdir
düzlağa çevrilən dənizdən qaçir!!!
göydə bir birilə qonuşur quşlar...
daha dəniz dəyir bura duz çölü
burdan hər canlinin qaçmasi gərək...
bir yanda urmu dur bir yanda təbriz
arada can verir susuzdan dəniz...
çaylarin axari axmir dənizə
arazin da suyu gəlib çatmadi
duzlağa çevrilir duzlağa dəniz...
axari boğulub axar sularin
daha sulu çaylar çaylağa dönüb!!!
qiriblar dörd tandan qolun qanadin
urmu dənizinin son nəfəsidir
gözlərin önündə urmu can verir
can verir qocaman dəniz can verir
böyük faciyə dir azərbaycana
burda bir dəniz yox təbiyət ölür
burda təhlükəli faciyə doğur
burda bir millətin varliği gedir
burda təbiyət də hər nə var ölür
durnalar- sonalar dimdiyi duzda
dəniz qucağinda susuz can verir
susuzdan dodaği çatlayan dəniz
yardima çağirir axar çaylari
burda Artmiya nəsli kəsilir
burda eko sistem məhv olub gedir
bəlkədə nə bilim görmürük bunu
yoxsa əlacini edə bilərdik
yoxsa gərəklərin tələb edərdik
faciyənin dərin liğin bilmirik
cənnət azərbaycan cəhənnəm olur
biz hələ zarafat saniriq bunu!!
ya hələ uymuşuq boş vədələrə
biz hələ bilmirik irənc fikirlər
biz hələ bilmirik çox müğriz əllər
bizi məhv etməgə pilanlar çəkir!!
oyan azərbaycan yatma bu qədər...
yalançiq vədələr - əməlsiz sözlər
bizi yuxlatmağa saxta layladir!!
urmu gölü göz önündə can verir
duzlağa çevrilir urmiyə - təbriz
duz çölü yaranir arzular boyda
inanmayin boş vədəyə - boş sözə
pilanli cəhənnəm yaranir burda!!!
yalniz bir yolu var - bircə yol qalir
yeni bir inqilab - yeni bir istək
yoxsa hər canlinin qaçmasi gərəı...
نوشته شده درچهارشنبه بیست و سوم مرداد 1392ساعت 15:4 توسط شاهین| |

                                         


رحمت یاغیشینی یاغدی اوستومه
 
منی منلیگیمه قایتاران بولوت
 
یولوما چیراق دیر ، شعریمه ایلهام
 
منی شنلیگیمه قایتاران بولوت
 

اونون اوجالیغین داغلار بیلیردی
 
قامتین ایمه دی نه کدر ، نه غم
 
نانجیب ظالیمه ، قودوز دوشمنه
 
بولوت شیمشگینی شاخدی دم به دم
 

نه گؤزل ایزله دی قورقوت دده نی
 
ائللره یاییلدی (( سازی نین سؤزو ))
 
آرادی (( اوغوزو )) گزدی (( بایاتی ))
 
مقدس ساییلدی (( سازینین سؤزو ))
 


کیمسه ویقارینا ده یه بیلمه دی
 
ویقارلی یاشادی اوجا داغ کیمی
 
ثمر وئردی زامانینا چاغینا
 
ثمرلی یاشادی بارلی باغ کیمی
 

قارانلیق گونشی بوروین زامان
 
(( بولوت )) بولوت اولدو ایلدیریم شاخدی
 
سهندین سینه سی وولقانا دوندو
 
ظالیمی اودلارا یاخدی! نه یاخدی!
 

یانیب یاندیرمادی ظولمون اوجاغین
 
چکدی قایغی سینی دوغما ائللرین
 
قلم عصیانینی بیتیرمک ایچون
 
چکدی آجی سینی ، قارا یئللرین
 

منده زامانیمین عوصیان سسی یم
 
هاراییم قوپاجاق سسه دولموشام
 
خالقیمین آهی یم گؤیه قووزانیب
 
(( بولوتدان )) دوغولوب (( شیمشک اولموشام )).

شعر: شیمشک شهبازی.

نوشته شده درشنبه پنجم مرداد 1392ساعت 16:42 توسط شاهین| |

 
( یول )                                                                

یول باشلانیر ، انسان گئدیر یول قالیر! گئدنلردن گله جگه ایز قالیر ، یالقیزجا سفرین باشلایان کیمسه ، چالیشیر ، دانیشیر باشقالار ایله ، توپلوملار یارادیر اؤتدوکجه زامان. دیلله شیب ، بیرلشیب ، یولداش اولانلار ، اولایلار یارانیر آیریلیر بیردن ، انساندان انسانا قالان یادیگار ، یالنیز آجیلی-شیرینلی خاطره لردیر.
حیات دئییلن بیر دفتر کیمیدیر! گونلر اونون یازیلمامیش آغ صحیفه لریدیر!!!! انسانلارین ائتدیکلری او دفتره یازیلان - یازیلار دئمکدیر!!!
ایندی انساندیرکی نئجه یاشاماسی ایله حیاتین آغ صحیفه لرین یاشاییش قلمی ایله یازیب دولدورمالیدیر!!
حیات یولدور ، اوزون بیر یول ، گئجه سی وار ، گوندوزو وار ، ائنیشی وار ، یوققوشو وار...
مقصد ایچون ، منزل ایچون ، سیلدیریملی اوچوروملو قایالاردان آشمالییق.
زامان - زامان ، دؤنه - دؤنه بو دونیانین یوللاریندا ، حق له باطیل آراسیندا ، دؤیوش گئچیب قانلی دؤیوش.
سویغونچولار یول کسیب دیر آمما یئنه یول آدامی یولون گئدیب. سویولوبدور ، دؤیولوبدور ، آمما گئدیمینه داوام وئریب.
زامانلا دؤیوشن اولو بابالار ، ظالیم لرله باریشماییب ، یئرسیز یئره چالیشماییب. آددیم - آددیم حاق کاروانین اؤنه سوروب. بیز اونلاردان ایز ایزله ییب ، گؤز تیکمیشیک صاباحلارا. حک ائدیریک بیز تاریخین سینه سینه ، بیزی بیلسین بیزدن سونرا گلنلر...
بیلسین لرکی سیخینتیلار ، بوغونتولار ، طیلیسیم لی قارا گونلر گؤرموشوک. زیل قارانلیق گئجه لرده بیز بو یولو بورا قده ر سورموشوک. سیز قالدیرین قایالارین زیروه سینه بو یولو...
بیر گیزلی سس ، بیر غریب دویغو ، سانکی بیزی یولچو سانیب گل - گل دئییر...
یول بیزی چاغیریر دئمک. بیزی چاغیران سس تاریخ بویو انسانلیغین آزادلیق بایراغین اله قالدیران یول شهیدلرینین عصیان سسی دیر! بیزی یولون داوامینا چاغیریر...
او چاغریشلی هارای سسی ، کوبانین داغلاریندان قالخان ، ارنستو چگوارانین انقلاب سسی دیر...
او سس آفریقاداکی قارا دریلی انسانلارین تمیز اورک لرینین دؤیونتو سسی دیر!
هندیادان قالخان قوجامان گاندی نین آزادلیق سسی دیر!
او سس اودلار دییاریندا ستارخانین - باقرخانین ، پیشه ورینین هابئله حیدرخان عمواوغلونون حاق هاراییدیر!
ائشیدن قولاق لار ، دویان اورکلر ، انسانلیق حاققینی سئون کیمسه لر ، خیالسیز - خیالسیز یوخلایا بیلمز! او سس لر هر آن چاغیریر بیزی...
او سس باریشماز بابکین عوصیان سسی دیر. بوتون انسانلاری ، انسانلیغی اویانیشا چاغیریر دئمک!!
ائشیتدیکجه آلیشیرام اؤز ایچیمده ، سانکی آلاولارا بورونور جانیم ، گئییمیم اود اولور یاندیریر منی.
آغلاییرام ، کیمسه گؤرمور گؤز یاشیمی. ایچریمده هیچقیریلار بوغولور...
هاراییم ، هاراییم سس سیز هاراییم! ایچیمده بوغولور هارایلار منیم!!!
مقصد اوزاق ، یوللار اوزون ، آددیم - آددیم قورخو وار! سحر آخشام ایزله ییرم ، یول ایزین.
قاریش - قاریش قان ایزی وار بو یولدا...
اوره یی قان ، باغری یانیق لاله لر ، حسرت - حسرت یولا دالغین باخیللار...
یالقیز لالا ، یولدا ، یولچو گؤزله ییر...
بلکه ده نه بیلیم بو قانلی چیچک ، یولدا اؤلن یولچولارین قانیدیر؟؟؟؟!!!!
 ۸۴/ ۱۰ ( چیلله آیی ) ۲  اینجی نومارا / بولتن انجمن سلامت
 
 اجتماعی آذربایجان

نوشته شده دریکشنبه بیست و سوم تیر 1392ساعت 1:40 توسط شاهین| |

ایچیمده بیر هارای

منی چاغیریر،

اویان نه یاتمیسان، اویان، دور

دئییر...

اونودما خالقینا وئردیگین

 سؤزو

دایان سؤزون اوسته، دایان، دور

دئییر...

وعده سیز یوخودان منی

اویادیر

واختیله اویانان

ایچیمده کی سس!!!؟؟

حاقلی بو خالقیمین

حاققی یولوندا،

ازلدن سؤز وئریب

آند ایچمیشم

من...

وعده سیز یوخولار اویدورسا منی

بیر آن قویماز یاتام

ویجدانیم سسی!!!

ده رین دویغولارین اوجا سسی دیر

منی غفلت لردن اویادان بو سس

هارای یاتما دئیه

چاغیریر منی...

ایچیمده کؤکله میش ظفر نغمه سین

اومود ماهنیلارین چالیر

دم به دم...

بیر آن یورولمادان

مقصده دوغرو

اودورکی چاپیرام

اینام مرکبین...

منی سارسیدانماز

نه قار ، نه کولک،

منی قورخودانماز

قانلی یول کسن!!!!

یول اوزره قورخویا یوخ دئمیشم من.

قانلیدیر بو یوللار

اوزاقدیر منزیل

آنجاق کی سونونا اینام لی یام من...

بو یولون یولچوسو اولاندان بری

ایناملا چاپیرام منزیله دوغرو...

عشقین زیروه سینه ایناملا چاتان

قات-قات طیلسیملری

سیندیرار یقین!!!

خالقیما وورغونام

اینساندیر عشقیم

عشقیم ایرادمله

سیناجاق بیر گون

مانع لر قاپیسی پولاد اولسادا!!!

باشیمدا یارانان آزادلیق عشقیم

کؤنلومو گتیرمیش منی بو یولا

حورریت یولونون جان فداسی یم

منی ساخلایانماز یول گئدیمیمدن

دوشمن تپه دیرناق

سیلاحلانسادا...!!!

الیمی- قولومو باغلایار آنجاق،

فیکریمی دوستاقدا ساخلایا بیلمز!!!

داریسقال دونیادا جیسمیم حبس اولار

حبس اولا ماحالدیر

آرزیم، دیله ییم!!!

قیرار زنجیرلری

سرحدلر آشار

ایچیمده یارانان

بو های، بو هارای

باشیمدا تاپیلان بو یئنی فیکیر...

قانلی دوشمن لرین اودلو سیلاحی،

فیکیر سیلاحیملا دؤیوشه بیلمز!!!

 دؤنه لر دئمیشم قانلی دوشمنه

چک اودلو سیلاحین،

چک، اؤلدور منی!

قوی قانیم سووارسین آزادلیق

جیلین...

اؤلومون سون سیلاح سانان بابامین!!!

آزادلیق درسینی اؤیره نمیشم

من...

مندن گرک قورخسون منی اؤلدورن

مندن گرک قورخا اؤلوم اؤزوده!!

آزادلیق یولونون یولچوسویام من

الیمده اؤلوم تک سون سیلاحیم وار

منله ساواشانماز

اودلو سیلاحلار..

نوشته شده درجمعه بیست و چهارم خرداد 1392ساعت 20:43 توسط شاهین| |


قارا قیش دان گیلئییم وار

بیزه آغ گؤستریر اؤز رنگینی آنجاق...

اوزو آغ او قارالیق دان گیلئییم وار!

ائله دولموش اوره گیم کی قلمیم ده یازا بیلمیر

آخی بیر عؤمر یازیب دیر یارین آدین پوزا بیلمیر!

یاردان آیری قالا بیلمیر

غمی تارین چالا بیلمیر

آخی سئوگیم منه بیر دونیا یاراتمیشدی اؤلوم سوز

او دئییردی سئویرم من سنی سؤزسوز

ایندی اولموش بودا بیر سؤز ، قورو بیر سؤز!

یانیرام هر گئجه سن سیزلیک الیندن

یازیرام او غمه باتمیش قلمیم نن

سنه نیفرین ، سنه ناله ، سنه آهیم

سنه یوخ آیری جوابیم!

سن اورک اوغروسوسان

هر شئیی پولدا گؤرورسن

سن پولون یولچوسوسان

سن قارانلیق یولوسان


اوره گیم تک دولوسان!!

گؤزلرین دای منیله هئچ نه دانیشمیر 

گؤزلرین جانیمی آلمیر

اوز - گؤزون دای هئچ اوتانمیر

باخیشین عشقیمی قانمیر

او ملاحتلی باخیشداندا خبر یوخ

گؤزووا کاش ده یه مین اوخ!!

من سنی سئوگی بیلیردیم،

سنه قلبیم دئیه رک ، سنی من جاندا بیلیردیم

سنی ناموسلو بیلیردیم!

سن گرک آتش عشقینده یانایدین

دئمیرم منله اولایدین ، منه بیر بوسه وئره یدین!

دئییرم کاش کی اغیار گؤرن گول اوزووو منده گؤره یدیم

دردیوی منده بیله یدیم ، گؤز یاشین منده سیله یدیم!!

سن منیم آللاهیم اولدون ، سن باشیمدا تاجا دؤندون

تاج اولارکن آغیر اولدون، سن گئدیب اؤزگه نین اولدون!!

اوره ییمده یارا اولدون!! باشیما سنده کول اولدون!!

سن گؤزومده یاش اولوبسان ، ساری گول میثلی سولوبسان

اوره گین تک داش اولوبسان ، منطیقین تک بوش اولوبسان

یئنی بیر سؤزده ائشیتدیم: سن گئدیب بایقوشیلا یولداش اولوبسان!

تاییوا سن توش اولوبسان! هر کسین اؤز پایینا ، اؤز تایینا میصداق اولوبسان

سن بؤیوک بیر یالانیمسان ، سن زهر تک بالیما چوخ جالانیب سان

سن بو دونیانی قاتیب سان! وفاسیزلیق میدالین سن قازانیب سان

سن اؤزوندن باج آلیب سان!!!!

داها عشقین کیتابین من بوکه جم


داها تنهالیغا باش ایمه یجم ، یئنی دونیا تیکه جم 

گئده جم من یاشییام ، آیری عشقین هوسینده

چوخ سویوقدور نفسینده ، قالمیرام من قفسینده!!

او یالان سؤزلریوه من تئز ایناندیم ، غم دونیانی قازاندیم

سنی من اؤز ائلیمه فخر بیلیب ، فخریده ساندیم

ایندی فخریمدن اوتاندیم ، بلکه سندن ده اوساندیم!!

ایستی یئر ، ایستی قوجاق ، گؤزله ییر اؤزگه یاتاقدا

سنین عشقین او اتاق دا ، سنین عشقین ائله او چاغدا

سنده صاف دویغو یالاندی ، سن هوسدن یارانیب سان

اون اوچونده تالانیب سان!

قارا قیش دان گیلئییم وار ، قارا قیشدا یارانان

قارا قیش نسلینه قارقیش ، اونا قارقیش

سئوگیمه آلقیش ، اونا قارقیش!!!

بیلیرم قارقیشیم آلتدا قالاجاقسان

سنه قارقیش سنه قارقیش سنه قارقیش...!!!!!!!!!!

شعر: شیمشک شهبازی نین اوغلو پژمان شهبازی نین دیر.
نوشته شده درپنجشنبه شانزدهم خرداد 1392ساعت 19:47 توسط شاهین| |

محو اولور - محو اولور

آمان محو اولور

آنالار الیله آنا دیلیمیز!!

آنانین لایلاسی آنا دیلیله

کؤرپه نین داماردا قانیدیر دئمک.

کؤرپه لر آنانین قوجاغینداکن

احساسی محو اولور ، عشقی محو اولور

محبت دویغوسو ، حیسی محو اولور،

آنانین لایلاسی ساختالاشاندا!!


لایلای بالام ائشیدرکن کؤرپه لر

اورک ده قایناییر جوشور دویغوسو،

اؤزگه لر دیلیله ساختا لایلالار

دوندورور کؤرپه نین حیسی نی دئمک!!

آنانین لایلاسی شیریندیر ، شیرین

کؤرپه نین حیسی نی جوشدورار آنجاق،

آنا اؤز دیلیله چالا لایلاسین!

ایچیمدن - ایچیمه آغلاییرام من

آنالار الیله محو اولان دیله!!


نوشته شده دریکشنبه هشتم اردیبهشت 1392ساعت 23:56 توسط شاهین| |

کئچیر زامان کئچیر عؤمور گون کئچیر
اسیر قارا یئللر تالان گونومدور
دیش دوشور آغاریر قارا ساچلاریم
فلک قانادیمی یولان گونومدور

آرزومو دونیادان تام آلمامیشدان
گؤزللر الیندن جام آلمامیشدان
گؤردوم جاوانلیقدان کام آلمامیشدان
قوجالیق طبیلین چالان گونومدور

بیر گئجه خیالسیز یاتا بیلمیرم
خیالیم یوکسک دیر چاتا بیلمیرم
آتیرام باشیمدان آتا بیلمیرم
داها خیاللارا دالان گونومدور

شیمشک آغیرلاشیر کدر غم یوکوم
حکیم سیز درمانسیز نئجه درد چکیم؟
دردیمه گلمه دی درد بیلن حکیم
گؤزلریم یوللاردا قالان گونومدور
نوشته شده درپنجشنبه هشتم فروردین 1392ساعت 15:30 توسط شاهین| |

دایاز دوشونجه نله
آلچاق لیغین لا
اؤزونو حاق بیلیب
منی دانلاما
ده ییرماندا آغارماییب ساچلاریم
سنین بیلدیگین جه من ایتیرمیشم
دومانا دوشموشم قارا دوشموشم
قارانلیق گئجه نین قارا پرده سین
گونش ایسته گیم له دلیب کئچمیشم
یول لاردا حقیقت یولون سئچمیشم
سانماکی عؤمروم ثمرسیز کئچیب
حیات گونلریمین هر آنلاریندا
اومودلاری آرزیلاری اکمیشم
بیته جک ثمرلی ، بارلی بیته جک
حیاتدا اکدیگیم گونش آرزیلار
فیکرین چوخ دایازدی همتین آلچاق
نئجه بیله جکسن درین لیک نه دی؟؟
دایازلار بیلمزلر درین لیک لری!!
همتی اوجالار فیکری درین لر
آراشیب حیاتدا سئیر ائیله ین لر
قورخمادان جومارلار درین لیک لره
عؤمروم دن گونوم دن ده یر وئرمیشم
عؤمور ده یریله حیاتیم بویو
زامانا اکمیشم شن گله جه یی
بیته جک ثمرلی ، بارلی بیته جک
زاماندا اکدیگیم گله جک جیلی...
ظولمت گئجه لرده قارا گونلرده
اومودلا اکمیشم شن گله جه یی
ظولمت لره دؤزه - دؤزه
قارا گونو اوزه - اوزه
صاباح گله ن نسیل لره،
آرزیلاردا بئجرمیشم
شنلی چاغی ، آغ گونلری
بیر گون سحر دان چاغیندا
گونش کیمی یاییلاجاق
ظولمت لرده ناکام یاتان
منیم سونسوز آرزیلاریم.


(( بو شعری سونای باجیما ایتحاف ائدیرم .))

نوشته شده درچهارشنبه بیست و سوم اسفند 1391ساعت 21:38 توسط شاهین| |

قیلینج لارین سسی گلدی
گئچمیشلردن ، اوزاقلاردان
آت کیشنه دی
((ایتی)) چایین قیراغیندا
اوغوز بابام قییها چکدی
غضبیندن یئره گؤیه
نیفرین دئدی
حارام اولسون سیزه منیم
آدیم ، سانیم
آی بئ غئیرت اوغوللاریم
((مورو)) داغی دوشمن باسیب
((کلبجریم)) یارالیدیر
باتدی منیم آدیم سانیم
باسیلیبدی قاراباغیم
نه یاتیب سیز عارسیز-عارسیز
دده قورقود بویلاریندا
اؤلدو داها ((قارا چوبان))
یالان اولدو دلی (( دومرول))
حاییف اولسون او آدلارا
حاییف اولسون
تاریخ دولو شان شوهرتلی
آدا ، سانا
دوشمن باسدی قاراباغی
نه قاراباغ؟
تالاییبللار هر وارلیغی
عارسیز-عارسیز
خوش خیاللی
شیرین یوخو،
یوخلاییب سیز...
حارام اولسون اوستوزده کی
آد ، سان سیزه ،
اوغوز بابام دئدی گئتدی!!!
آت کیشنه دی آت کیشنه دی
چنلی بئلین سیلدیریم لی
اوچوروم لو یوللاریندا
قوچ کوراوغلو نعره چکدی
کور اوجاغلی یوردوم دئدی!!!
غئیرتیمه گولدو منیم!!!
آت کیشنه دی ساوالانین زیروه سینده
آل گئییملی اولو بابک سسه گلدی
باخدی منه غضب لندی ،
سیز قانیمی آیاقلادیز ،
قاراباغدان چکیلنده...
دئدی منه ، دئدی گئتدی
آت کیشنه دی خان آرازین ساحیلینده
کیشنه سینه نبی گلدی،
یوردوموزو بؤلوم-بؤلوم
قاریش -قاریش ، دیلیم-دیلیم
دوغراییب لار گؤره ن آندا،
بیزه نیفرین ائدیب گئتدی...
آت کیشنه دی شاه سهندین اتگینده
ستارخانین اولکه سینده
کئچمیش لریم یادا دوشدو
واراق - واراق واراقلادیم تاریخی ،
تاریخلرده بابالاری ایزله دیم
اونلار سولطان ایمیش
اونلار خان ایمیش
اونلار داهی اینسان
غئیرت اوجاغی
من ایسه قول اولموشام
قول...!!!!
(ایتی چایی: قدیم تورکوستاندا بیر چایین آدیدیرکی ایپار خانیم بو چایین قیراغیندا قهرمان لیغلار یارادیب)
(مورو داغی: قاراباغدا اؤلان بیر داغین آدیدیر)
83/10/13
قالیب: سربست

نوشته شده درچهارشنبه نهم اسفند 1391ساعت 0:44 توسط شاهین| |

اؤنجوللری یوخو گؤرور بو خلقه!

بیر دئمیرلر

بو میللتین دردی نه دیر؟

اودو نه؟

هئچ دئمیرلر بو میللتین

ایسته گی نه؟ فیکری نه؟

دونیا خلقین دوشمان ائتمیش بیزلره

اؤز فیکریله چپر چکیر بیزلره

لعنت اولسون شئیطانلارین فیکرینه!!!

بیز اینسانیق دونیالارلا قارداشیق

کیم توره تمیش؟ دوشمان لیگی بیزلره؟!!

بیر عؤموردور هارای چکیر بیر میللت

بیز دونیانی یولداشلیقلا سئویریک

باریشیق لا ، قارداشلیق لا سئویریک!

ائشیده ن یوخ ،

دویان یوخدور بو سسی...

باشداکیلار اؤز فیکرینی داشی ییر!!!

قان-قان دئییر

اؤز سؤزونو دانیشیر...

آمریکالی - روسیه لی - فرانسه...

اینسانلار اینسانا دوشمان دئییل کی

لعنت اولسون فیتنه سالان

شئیطانا...

لعنت اولسون قان تؤره لده ن

قورقولارین فیکرینه...

لعنت اولسون اؤنجوللرین

فیتنه سینه فئلینه!!!

فیتنه سالان امپریالیست ، صهیونیزم

قاراباغدا داشناکلاردی قان ایچه ن!!

ایران لی لار جان آتیللار دوستلوغا...

قورخودایام پیس دوروما نه دئییم؟!!!

اوره ک تیتریر

قلم قورخور

اسیره م

بو فیکریم له بئله شئعیر یازاندا...

بسدیر داها

سوسمالی یم

قورخو وار!!!

بو قورخو ایله نه دوشونوم؟!  نه یازیم؟!!

نوشته شده دردوشنبه بیست و سوم بهمن 1391ساعت 19:59 توسط شاهین| |

سلام عزيز دوستلاريم و وطنداشلاريم ، 30 دقيقه قاباق مشگينين (خياو) آرا قووشاقيندا (وسط چهارراهيندا) پييادا يولوندا آدديم آتيرديم كي گؤزوم جام جم قزئتینه (روزنامه) دوشدو ، اليمه آليب و اوخوياندان سونرا دونيا باشيما اوچدو. ((قارداش ، قارداشي ني پول اوسته هلاك ائتدي.)) شيمشك شهبازي نين بو مسئله يه آييد بير چارپاراسي ياديما دوشدو. بير آز بو شئعرلن تسكين ليك تاپديم. حئيفيم گلدي كي عزيز دوستلاريمي فايدالانديرمايام:
اينساندير دونيانين هر ياراشيغي
اينسان سيز بو دونيا نه ييمه گرك؟
معنا باغيشلايير سونسوز حياتا
اينسان اوره گينده موقددس ديلك

اينسان سيز بو دونيا بايقوش يوواسي!
اينسانلا قويولوب بو تمل داشي
اينساندير يارادان گؤزلليك لري
اينسانا باغليدير دونيانين باشي

اونون دوشونجه سي ، اونون دويغوسو
تاپير تاپيلمازي ، گئچديكجه زامان
محو اولار كايينات ، دونيا محو اولار
دونياني ياشادان اينسانديرٍ ، اينسان

گاهدان دولاشيرام ، گاهدان چاشيرام
بس نده ن اؤلدورور قارداش ، قارداشي!!!
خيلقه تين ان گؤزل وارليغي اينسان!
حئيوان تك ييرتارميش يولدا ، يولداشي؟!!!

اينسان نه دئمك دير قان تؤكنلره؟
ييرتيجي اولانماز موقددس اينسان
اينسان ليق آديني لكه لنديرير
اينسان گئييمينده قان تؤكن حئيوان!!!

حياتي چاغيرير گؤزل ليك لره
اينسان دوشونجه سي ، اينسان دويغوسو
اينسانا قاينايير ، اينسانا جوشور
(( شيمشگين)) اوره کده ، هر آن دويغوسو
نوشته شده دردوشنبه نهم بهمن 1391ساعت 17:32 توسط شاهین| |

شیرین سولو بیر بولاغین

قیراغیندا

ایکی سئوگی ، ایکی حسرت

خلوت ائدیب

سئودالارین دانیشیرلار

شنلیک ائدیب گولوشلرین

بؤلوشورلر...

توت آغاجی باشلارینا کؤلگه سالیب...

اؤتوب هیجران آجیلیغی

وصله چاتیب دانیشیرلار

عشق اودونا آلیشیرلار...

یام یاشیلدیر داغ دره لر

چیچک آچیبدی باغچالار

شن حیاتین یاز چاغیندا

طبیعتین باهاریندا

گؤزللیکده ن کام آلیرلار...

او بولاغین قانشرینده

ایکی قوجا،

بیری آنا ، بیری آتا

قوجا چینار کؤلگه سینده

گؤز تیکیبلر او صحنه یه!!

باهار گئچیب ، پاییز اؤتوب

قیشا دؤنوب عؤمورلری

آجی گونلر آغریلاری

اوزلرینده جیغیر سالیب

ساچ آغاریب

قاشلارینا قیروو قونوب

...         ...

حسرت حسرت - باخا باخا

خیاللارا دالا - دالا

قاییدیرلار گئچنلره

قوجا دؤنوب قاریسینا سووال وئریر

یادیندامی؟ سیزه ائلچی گلن گونو؟

بیر جیل اکدیک بولاغ اوسته؟

اکدیگیمیز او جیل ایندی

کؤلگه سالیر سئوگی لره!

بیزدن قالان سئوگی شویو

اوجاق اولوب سئوگی لره...

 

 

             شیمشک شهبازی

۱۳۸۳/۸/۱۸

نوشته شده درجمعه بیست و دوم دی 1391ساعت 20:47 توسط شاهین| |

با عرض تشکر، خواهشمندیم همانند ادوار قبلی برگزاری این دوره از جشنواره را هم با قرار دادن فراخوان در وبلاگ و سایت، چهره به چهره، کامنت‌گذاری، ارسال ایمیل، فرستادن پیامک و ... به اطلاع علاقمندان فرهنگ و هنر منطقه آذربایجان برسانید.



:ادامه مطلب:
نوشته شده دردوشنبه یازدهم دی 1391ساعت 18:6 توسط شاهین|

هارای چکیر زیروه لره دیرماشان

یول ،

بیزی سسلیر!

بیزی سسلیر

قان قادالی گئچمیشلرده

بابالاریم

گئده ن  یوللار...

بو یوللار،

بو یوللار

بو اوزون یوللار

هارادان باشلانیب؟

هارایا گئدیر؟

کیم نه بیلیر

ایلکی نئجه باشلانیب؟

کیم نه بیلیر

بو یوللارین

سونونو؟

بو یوللاردا گئده نلرین

ایزی وار

داش آتمایین یولچولارین یولونا

بو یوللارین

هر چانقیلی

هر داشی

بو یوللارین یئل ساووران توپراغی

گئدیشه چاغیریر بیز اینسانلاری

گؤره ن هارا چکیر

بو یوللار بیزی؟

یوللار اوزون ازلی یوخ ،

سونو یوخ

چوخلارینی یولدا یوروب بو یوللار

بیز هاراجاق گئده جه ییک

بو یولو؟!!!

بیزی هاردا یوروب ییخار؟!!!

مثلدی کی

یولچو گئدر ، یول قالار

دوز یولچودان

یول اوزره بیر

ایز قالار...

بیز گئده لی بیزده ن سونرا

گلن لر

یاخشی ، یامان

ایزیمیزی ایزله ییر

گؤره ن بیزیم نه ایزیمیز قالاجاق؟

بیزده ن سونرا

دونیامیزا گلن لر

بیزی دئییب

نه ییمیزه گووه نر؟!!!

یوللار اوزون جان آغریلی

بیز یورغون

هارا چکیر بو یول بیزی

گؤره سن؟

بابالارین ائتدیگینه گووه ندیک

اونلار زیروه لره چکمیش

بو یولو

دالیسیجا چکیر ایندی

یول بیزی!!!

بو یوللاردا داهی لارین ایزی وار

اوز قویموشام بابالارین ایزینه

اوزوم اوسته سورونورم

بو یولو

گئده جه یم هارا چکسه

         یول

                  منی...

                                 83/11/26

نوشته شده دردوشنبه چهارم دی 1391ساعت 19:18 توسط شاهین| |




shimshak-shahbazi

شاهین

shimshak-shahbazi

http://shimshak-shahbazi.blogfa.com

şimşək şəhbazinin türkcə şerləri

şimşək şəhbazinin türkcə şerləri

şimşək şəhbazinin türkcə şerləri

<-BlogAbout->

şimşək şəhbazinin türkcə şerləri

قالب بلاگفا

قالب پرشين بلاگ

قالب وبلاگ

Free Template Blog